साउन १ गतेदेखि जावलाखेल चिडियाखाना पुनः सञ्चालनमा

काठमाडौँ । गत असार ५ गतेदेखि बर्डफ्लु सङ्क्रमण पुष्टि पश्चात बन्द रहेको ललितपुरको जावलाखेलस्थित सदर चिडियाखानामा  २७ दिन पछि खुलेको छ । बर्डफ्लु सङ्क्रमण देखिएपछि राष्ट्रिय प्रकृति संरक्षण कोषले गत असार ५ गतेदेखि सर्वसाधारणका लागि बन्द गरेको हो ।

चिडियाखाना बन्द गर्नुपर्दा ३ करोड बराबरको आर्थिक क्षति भएको चिडियाखानाका सूचना अधिकारी गणेश कोइरालाले बताएका छन् । सङ्क्रमण नियन्त्रणमा आएपछि यही साउन १ गतेदेखि चिडियाखाना पुनः सञ्चालनमा आएको छ ।

चिडियाखानाका सूचना अधिकारी कोइरालाका अनुसार सङ्क्रमण देखिएपछि नियमित सरसफाइ, सङ्क्रमित जीवजन्तुको उपचार तथा आवश्यक सावधानी अपनाइए सामान्य अवस्थामा फर्किए पछि चिडियाखाना संचालनमा ल्याएको बताइएको छ । त्यसपछि पशु सेवा विभाग, केन्द्रीय पशु रोग अनुसन्धान प्रयोगशाला इपिडिमियोलोजी तथा रोग नियन्त्रण महाशाखाका वरिष्ठ अधिकारीको संयुक्त बैठकले चिडियाखाना पुनः सञ्चालन गर्ने निर्णय गरेको हो ।

सामान्य दिनमा दैनिक एक हजार ७०० देखि एक हजार ८०० आगन्तुकले चिडियाखाना भ्रमण गर्ने गरेको  सुचना अधिकारी कोइरालाको भनाई छ । शनिबार ५ हजारदेखि ७ हजार र आइतबार तीन हजार ५०० देखि पाँच हजार जनासम्मले चिडियाखानामा समय बिताउने गरेका गरेको र त्यसबाट मनग्य आम्दानी हुने गरेको जनाइएको छ ।

पुनः सञ्चालन भएको पहिलो दिन, साउन १ गते ८०० जनाले मात्र चिडियाखाना भ्रमण गरेको बताउँदै सुचना अधिकारी कोइरालाले भने, बर्डफ्लु सङ्क्रमण पुष्टिको समचार पश्चात आगन्तुकहरुको आगमन संख्या अत्यन्त न्युन रहेको छ । संक्रमणको त्रासका कारण अझै आगन्तुकको संख्या बढ्न सकेके छैन ।

चिडियाखानाले बालबालिका र ज्येष्ठ नागरिकका लागि रु १००, विद्यार्थीका लागि रु १५० र अन्य आगन्तुकका लागि रु २५० प्रवेश शुल्क लिँदै आएको छ । गत आर्थिक वर्षमा चिडियाखानाले करिब १८ करोड रुपैयाँ आम्दानी गरेको थियो ।

आर्थिक वर्ष २०८२÷८३ मा २१ करोड रुपैयाँ आम्दानी गर्ने लक्ष्य राखिएको भए पनि बर्डफ्लुका कारण लामो समय बन्द रहँदा लक्ष्य पूरा गर्न चुनौती थपिएको प्रशासनले जनाएको छ । हाल चिडियाखानाको टिकट काउन्टर बिहान १०ः०० बजेदेखि अपराह्न ४ः०० बजेसम्म खुला रहने व्यवस्था गरिएको छ । सबै आगन्तुक साँझ ५ः०० बजेसम्म बाहिरिनुपर्ने व्यवस्था छ । सङ्क्रमणअघि भने टिकट काउन्टर साँझ ६ः०० बजेसम्म खुला रहने गरेको थियो ।