एटीएमबाटै १०० रुपैयाँका नोट निकाल्न पाइने

काठमाडौँ । नेपाल राष्ट्र बैंकले दशैँ तिहारलाई लक्षित गर्दै बैंक तथा वित्तीय संस्थाका एटीएमबाट १०० रुपैयाँ दरका नोट पनि एटीएमबाट नै वितरण गर्ने व्यवस्था मिलाउन निर्देशन दिएको छ।

राष्ट्र बैंकको मुद्रा व्यवस्थापन विभागले नेपाल बैंकर्स संघ, डेभलपमेन्ट बैंकर्स एसोसिएसन र नेपाल वित्त कम्पनी संघलाई पत्राचार गर्दै सो मातहतका बैंक तथा वित्तीय संस्थाहरुका एटीएमबाट १०० रुपैयाँका नोट वितरणमा सहजता र  व्यवस्था मिलाउनका लागि निर्देशन दिएको हो ।

चाडपर्वका बेला साना दरका नोट सटहीका लागि बैंकका शाखा तथा काउन्टरमा हुने भीड घटाउने उद्देश्यले अनुसार एटीएमबाट नै पैसाको व्यवस्था गरिएको  राष्ट्र बैंकका सहायक प्रवक्ता सुधा शाह जानकारी गराए ।

यसअघि अधिकांश बैंकका एटीएमबाट ५०० र १ हजार रुपैयाँ दरका नोट मात्रै निकाल्न सकिने व्यवस्था थियो । राष्ट्र बैंकका अनुसार १०० रुपैयाँका नोट एटीएमबाटै उपलब्ध हुन थालेपछि साना दरका नोट आवश्यक पर्ने ग्राहकलाई काउन्टरमा लाइन बस्नुपर्ने बाध्यता कम हुने छ ।